الأربعاء، 11 يناير 2012

ف الشارع





ع الكورنيش قاعد من بدري
مستني نسمه تلمسني
أدارى فيها من الصّهد
من لحظات
مسّي عليّا وقعد جنبي
وبدأ يكسر بينا الصمت
أدانى إحساس بالألفة
من كُتر ما خدنا على بعض
أتكلمنا ف كل الدنيا 
جبناها بالطول والعرض 
فجاه قالّي
 أقفل الشّباك إل جنبك
داخل منّه عليّا البرد
استغربت!
حر بيعجن ف الإسفلت
والرّاجل حساس بالبرد!
قام من جنبي وهو بيضحك
وسألني بيعمل كده ليه؟
عدّى الشارع باصص ليّا
لسّه بيضحك
وانا مشوار مش قادر امشيه
الحيره في كياني تهد
وأنادى عليّا ما برد
والقاني طالع منّيا 
وانا ماسك فيّا وبشد
كُلّنا ع المهزوز ماشين 
ومفيش حد بيرحم حد 
وأطوّحنى بعزم ما فيّا
وارميني ولأبعد حد
وارجع تانى ألم ف بعضي
بأدور على شباك جنبي                                                                   
بطّوح مسكون بالبرد.

الناس




ليّا زمان أنا ماشى معاهم
ملقتنيش أبداً ويّاهم
فتعلمت أعيش أيامى
مستغنى عن كل النّاس
وما اتعوّت أفارق راسى
لو همّى شخبط ف أساسي
وتحمّل وأكونلى مداس .
وأشدّنى من سكّة غيرى
ولا غيّرت ف يوم مضاميني
واكرهني ف زحمة كرّاس
على كيفي كنت بعلّقنى
واسجني لو حفلت منّى
ولا احددني ف يوم دسّاس.
من يومها حساس بكياني
ولا معوج قرّب بكّاني
ولا بسمحلى أراجع شوفى
ومسمعليش لو اكون وسواس.


ضايع منّى




علي بدوّر
ليّا يومين
تايه منّى
ومش عارف ألقانى فين.
من ساعتين
قلُت أطلع برّه
بس راح اسأل عنّى مين؟
وقبلى ما اخطى برجلى الشارع
سمعت أنا صوتى
من ورا ضهرىبيصرخ فيّا
إنت سايبنى لوحد لمين؟
ليّا يومين 
بأدوّر وبنادى عليك
ولمّا تعبت
قُلت لنفسى أطلع بره
يمكن ألاقى حد يقولّى
فين أراضيك؟
ألقاك طالع
وسيايبنى وف نارى بهاتى
وهُنت عليك
إنت تعبتنى
وانا مش عارف كيف أرضيك
أخص عليك.

إلا الفجر





بأصحينى يوماتى بهيصه
وأقول ليّا خمسه وقوم
وأحايل فيّا وقول حاضر
وانا واقف على راسى بزوُم
خمسه ف خمسه وانا مش قادر
ولسّه معايا أنا مهزوم
واصرخ فيّا أقوم متلخبط
وبعاتب فيّا وبلوم
والقانى للجامع ماشى
وابليس  بيناور مأزوم
ف الشّارع عمّال يتنطط
ف دماغه عمّال بيخبط
حواليّا عمّال بيحوم
وانا ويّايا بقول يارب
الخطوه تتسطر عطر
وبكبر أنا ويّا الناس
صُحبه ويّا صلاة الفجر.

الأحد، 25 ديسمبر 2011

الحـــيرة





قطر الحيره تملّى راكبنى
والسّكه ملهاش سنفور
ولاّ محطه عليها يهدّى
عدى يا صوتى 
من خوفى المتشبّح ضدّى
أنا كان ليّا حلم صغير
وأغانى لحليم والست
كان من حظى 
إنّى أنا عشت الزمن الطّيب
ولعبت ف حواريه ودروبه
وهروبه كان عزّة نفس
م الطّواحين الضغط العالى.
كش يا قلبى وشفلك قبله
غير دى الطّبله
والزّحمه اللى ملاها الغش
هش الدوخه 
رش الميّه ف وش الدنيا
لحظه تفوق.
من فوق قالّى
لسّاك يا حمد فيك الطيبه
لسّه معشش فيك إنسان
آه يا جبان.
                                                                 

الأربعاء، 26 مايو 2010

شـــــكــله



دايماً واقف ليّا ف وشّى
مش قادر أفلت من إيدى
ومّشينى فوق السّطر.
ياما حاولت كتير أقنعنى
وأفهّمنى إن انا مش قطر.
كنت اسّحّب من قدّامى
وأهدّينى بكل مشقّه
قبل م يعلى صوتى علّيا
وألاقى إدياّا خنقانى
والاخر نختمها بشكله.
وافضل باصص ليّا بخوف
وانا مش طايق منّى الكلمه
ومصدرلى الودن الطّرشه.
لمّا لقيت الفرصه ف إيدى
واقدر أفلت منّى وطير
فضّلت ارجع تانى مكانى
وأعيش باقى العُمر أسير .

********



شكــــّــله

الاثنين، 17 مايو 2010

وصيّة


ليه كل م اوصّينى
وأدّينى ودنى
واسمع منّى
كلام يسكنّى
أفرح بيّا وخدّنى ف حضنى
وبعد م اسبنى
ومفيش ثانيه
ألقى كلامى طالع يجرى
ومعدّى م الودن التانيه....؟

**********



وصيّة

السبت، 15 مايو 2010

قوانين مطفيه ... صفر عجوز


لمّا بحاول أقرّب منّى
عقلى يكركب
رافض لحظه بصدق المسنى
أجرى ورايا بكل ما أملك
والآخر القانى طردنى ..
من بكره الباهت جوايا
واللى معايا ميكملشى
أكون ويّايا
غير تغريبه عنيفه صدايا.
حاله مخيفه
لمّا القانى رهن فواصل
حاصل جمعى صفر عجوز
منبوز فوق قوانين مطفيه.
وهميه مفاهيم الشوف
لحظة خوف
وانا مبخفشى
غير م الضّلمه
لمّ تشخبط فوق القلب........
مطلوب منّى ارسمنى دواير
دايخ فيها من غير ضامن
واكره اراهن بلا مضمون.
ملعون صوتى
لوليه سكّه
بعيد عن راسى
كواليسى مطبخ مفتوح
ومفيش مَد
رش الملح جوّه ف عينى
ولا طوّحنى ما بينى وبينى .
لمّى ياسكّه طريقك لمّى
وسيبيلى مسافات أمشيها
لمداين ملهاشى أسامى
ولا عناوينها جوّه كتاب
مرشوشه على جسر الضّى
شوارعها مفهاش عطشان
ولا سكّانها صليل الصمت
ولا حيران مسنود على حيرته
ولا تايه ضلل هربان
ولا مهزوز قبطان لمراكب
ولا حُريه صهيل هزيان.
التجاعيد مرسوم أيامى
وانا وجدانى ...
سجّانى أبو قلب رهيّف
لمّا بصاصى
بيباصى مفتاح الباب
أطلع واكنس من فوق قلبى
صراخ الغربه
وارجع تانى
أرد الباب .

*******************


قوانين مطفيّه ** صفر عجوز

الخميس، 13 مايو 2010

تقـلُّـب


بتصوّرنى حجر مدسوس
مهووس طايح مليان عتمه
ولوراح اشفنى ف أيها ناحيه
ح هرب منّى الناحيه التانيه.
مش عايز ليّا أقرّبلى
واتصادم بيّا واكهربنى.
بقرانى دايماً إتنين
واحد قسوته مش رحمانى
ومحصرانى ما بين ضوافرها
واتّانى عصفور مسحور
متصالح مع نفسه قايسها
بأقعّدنى معايا ندردش
وندحرج بينّا المواضيع
ومفيش مانع لو حنفرفش.
فجأه ألقانى بقلب وشى
وأشوف فيّا الناحيه التانيه
بأسيّبلى
القعده وكمان البيت
وأشوف غيرى يشدّنى منّى
لحسن منّى أنا مليت
ووجودى معايا مجننى .


**************



تقــــلّب


غُــلب



لو كان ليّا انا خاطر عندى
كان من بدرى سمعت كلامى
ومزقّتش الباب ودخلت
وأشرّبنى ورق مسموم
واكنبنى متسطّر غُلب.
وأكسّر فوانيسى بإيدى
وأفخخنى مساحة رعب
تاهت منّى معالم شوفى
وانا مقسوم بين جزر ومد.
أنا إنسان ف مقامى الأول
وارفضنى لو حبقى البسط
مهروس تحت عجل إسرافى
ف الشّعبطه وف نط الحبل.
وأشوفنى رحّال تغريبى
ومانيش قادر افك الخط
وأصحّينى
ألقانى بين وجعى معلق
ومنيش طايل سما ولا أرض .


***************



غُــــلب

بسـتـعجلـنـى


من شدّة ما تعبنى معايا
ناوى ارمينى
من جوّايـا
وأبعترنى ف أى متاهه
واطردنى من تحت سمايا.
دايماً قايد فيّا النّار
بستعجلنى
رغمن إن الشارع هادى
ومفيش حد ورايا بيجرى.
أنا من بدرى طموحى مقاسى
ومرتّبنى
أمشى على مهلى
اللى ف جيبى خالص ليّا
ولا ف الضّلمه حد واقفلى
وان كان بكره حيجى واقابله
حلقى بتاعى ف إيدى بأسمى
وميلزمشى
أدينى فرصه
ف لحظه وادوسنى.


***************



بستعجــلنى

وحــــدى


أنا بفرحلى
لمّا تملّى أشوفنى لوحدى
قاعد ورا شوفى برصُدنى
واقرانى ف عنين النّاس.
اللى يقولى إن انا متعالى
واللى يقولى أغير حالى
واللى عايزنى أعيش أوهامه
ولو رسيت وكدبت عليه
واللى نويلى أصغّر حجمى
وأوطّينى عشان أجاريه.
وانا واقف قدّامى ف حيره
بطّوحنى ردود أفعالى
بسألنى دول عايزين أيه؟
رغمن إنّى
م حاولتش محولتش أبنينى عليهم
ولا اوريهم منّى فجاجه
ولا عوّتنى أحفر ليهم.
حفضل عمرى أعيش معادينى
لو ح جبرنى أجرى عليهم.
وعشانى رايح ابقى معايا
وانا متأكد مش حرضيهم
ولو ا كوّرنى
بين رجليهم.!

*************



وحـــدى

معرفنيش


عدّيت جنبى أكتر من مرّه
وإديّا كانت تشاورلى
م شيفنيش ..
لمّا صرخت سمعت انا صوتى
عليّا جريت ...
رفعت عنيّا لوشى أشوفنى
إتهزّيت
مديت إيدى لأيدى أسلم
وكأنّى مقابلنى صُدفه
معرفنيش
طول الوقت أنا كنت معايا
ومفيش ثانيه مشيت من غيرى
لكن فينى عن يوم شفتنى
أول مرّه ... قبل الشّيب
م يدق نفوزه
واتّجاعيد برّايا وجوّه
وابقى قديم
وأتوه عن شكلى
ومعرفنيش الإ من صونى .


***************




معرفنــيش


ما بشوفنيش


كُنت بحب القهوه
لمّا اقعد أشربها معايا
ليّا زمان مشربتش قهوه
ولا بلقانى اقعد ويّايا
ما بشوفنيش أبداً دلوقتى
ولا عارف مشكلتى معايا ...
إحساسى بيا معدوم ..
بغيابى اللى ملوشى نهايه
بسأل عنّى كل النّاس
أتارينى مش وحدى حكايه.
أن مقدرش أفرّط فيّا
أو ألغينى من تكوينى
ولو حتمت ..
رايح اكسر بابى
واجمعنى من جوّه غيابى
وافرضنى بالقوّه عليّا .


*************



مبشفّــــــنيش

راح امشّــينى


كُنت افتحلى باب عربيتى
وأقعّدنى ورايا واسوق
كُنت أقرّينى جوباتى
وأبدّينى ف نومى ليلاتى
وقبل م نادى
ألقانى واقف على بابى
كنُت بعلّمنى الإصرار
وأرتّبنى فوق مسافاتى
وف يوم زنقه
بصّيت ليّا ...
لاقيتنى لوحدى
وانا جوايا قاعد متخبّى
مدّيت إيدى أشدّنى ليّا
هربت انا منّى.
كنت اتمنى لو أعرفنى
قبل م اضيع وقنى معايا
قبل م اخدنى لسكّة حلم
وأكعبلنى
والقانى راجع لورايا.
لمّــا طالت وقفتى بيّا
ولسّانى أنا بستنّانى
كان من حقّى
إن عليّا اعلن عصيانى
واتحدّانى ...
وأمشّينى وغصبن عنّى
الشّوط من تانى .

***************



راح امشّيــنى